ਆਸ-ਸਲਫਾਸ

ਆਦਮੀਂ ਹਾਂ ਮੈਂ ਫ਼ਰਿਸ਼ਤਾ ਨਹੀਂ ਮੈਨੂੰ ਅਹਿਸਾਸ ਹੈ
ਅੰਬਰ ਨੂੰ ਹੇਠਾਂ ਲਾਹ ਲਵਾਂਗਾ ਫਿਰ ਵੀ ਮੈਨੂੰ ਆਸ ਹੈ

ਆਖਦੇ ਕੁਛ ਬਦ-ਗੁਮਾਂ ਕੁਝ ਆਖਦੇ ਨੇ ਵਹਿਬਤੀ,
ਮੇਰਿਆਂ ਕਦਮਾਂ 'ਚ ਕੁਛ ਕੂ ਅੱਥਰਾ ਉਲਾਸ ਹੈ

ਜੋ ਕਰਨਗੇ ਸੋ ਭਰਨਗੇ ਲਫ਼ਜ਼ਾਂ ਦਾ ਬਸ ਜਾਲ ਏ,
ਕੁੱਲੀਆਂ ਵਿੱਚ ਨੇ ਦੇਵਤਾ ਤੇ ਆਸਣੀਂ ਬਦਮਾਸ਼ ਹੈ

ਡੇਅਰੀਆਂ ਨੇ ਲੈ ਲਈ ਵੱਗਾਂ ਤੇ ਬੇਲਿਆਂ ਦੀ ਥਾਂ,
ਹੁੰਦਾ ਅੱਜ-ਕੱਲ ਹੋਟਲਾਂ 'ਚ ਹੀਰ-ਰਾਂਝਾ ਰਾਸ ਹੈ

ਕਣਕ ਸਾਰੀ ਖਾ ਲਈ ਕੁਛ ਭਾਈ ਜੀ ਕੁਛ ਵਹੀ ਨੇ,
ਲੈ ਖੇਤਾਂ ਦੇ ਰਾਜਿਆ ਤੇਰੇ ਖਾਣ ਲਈ ਸਲਫਾਸ ਹੈ

ਫੁਲਾਂ ਨੇ ਸੁਣਿਆਂ ਖਾ ਲੈਣੀ ਏਂ ਅੱਜ ਰਾਤੀਂ ਸਾਈਨੈਡ,
ਗਿੱਲ ਕੱਲ ਸ਼ਹੀਦੀ ਦਿਵਸ ਉੱਤੇ ਨੇਤਾ ਦਾ ਇਜ਼ਲਾਸ ਹੈ