Wednesday, July 29, 2009

ਸੱਚ

ਤੂੰ ਤੇ ਬੜਾ ਰੋਕਿਆ ਸੀ ਮੈਂ ਹੀ ਸਾਂ ਗੁਮਾਨ ਵਿੱਚ

ਤਾਹੀਂ ਅੱਜ ਕੱਲਾ-ਕੱਲਾ ਭਰੇ ਹੋਏ ਜਹਾਨ ਵਿੱਚ

ਘਰਾਂ ਵਿੱਚ ਕੈਕਟਸ ਰੱਖੇ ਨੇ ਸਜਾ ਕੇ ਲੋਕਾਂ,

ਕਿੰਨੇ ਸੋਹਣੇ ਫੁੱਲ ਹੁਣ ਖਿੜੇ ਸਮਸ਼ਾਨ ਵਿੱਚ

ਤੱਕੜੀ ਤੇ ਹੱਥ ਦੋਵੇਂ ਪਾਸਕ ਸ਼ਿਕਾਰ ਨੇ,

ਫ਼ਰਕ ਨਾ ਰੱਤੀ ਹਾਥੀ ਕਮਲ ਕਮਾਨ ਵਿੱਚ

ਖੁਸ਼-ਰੰਗ ਸ਼ਿਅਰ ਤੇ ਗ਼ਮ ਭਰੇ ਗੀਤ ਵੀ ਨੇ,

ਤੂੰ ਕੀ ਲੈਣਾ ਲੈ ਲੈ ਵੈਸੇ ਸਭ ਹੈ ਦੁਕਾਨ ਵਿੱਚ

ਮਾਨਸ ਦੀ ਜ਼ਾਤ ਇੱਕੋ ਆਖਦੇ ਜੋ ਉਹਨਾਂ ਦੇ,

ਕੱਪੜੇ ਨੇ ਦੇਵਤੇ ਦੇ ਵਸਦੈ ਸ਼ੈਤਾਨ ਵਿੱਚ

ਰਾਮ ਤੇ ਵੇਦਾਂਤੀ ਤਾਂ ਤਖਤਾਂ ਤੇ ਚੜੇ ਰਹਿਣੇ,

ਮਰ ਜਾਣੈ ਲੋਕਾਂ ਇਸ ਮਜ਼ਹਬੀ ਘਾਣ ਵਿੱਚ

ਕਾਹਤੋਂ 'ਇਕਬਾਲ' ਸੱਚ ਆਖਕੇ ਸਹੇੜ ਲਈ,

ਹੋਰ ਬਲਾ, ਪਹਿਲਾਂ ਹੀ ਨਾ ਜਾਣ ਨਾ ਪਰਾਣ ਵਿੱਚ

1 comment:

  1. sat shri akal paji tuhadi har ek rachna bahut hi lajwaab hai rab tuhanu chardiyan kalan ch rakhe te tusi edan hi likhde raho....
    rab rakha
    preet

    ReplyDelete