ਗਲ ਵਿੱਚ ਕੰਠਾ ਕੰਨੀ ਨੱਤੀਆਂ ਪਹਿਨਣ ਦਾ |
ਸਮਾਂ ਕਿਥੇ ਹੈ ਵਾਂਗ ਨਚਾਰਾਂ ਨੱਚਣ ਦਾ |
ਗਹਿਣੇ ਨੇ ਮੇਰੀ ਮਾਂ ਦੇ ਗਹਿਣੇ ਮੁੱਦਤ ਤੋਂ,
ਚੇਤਾ ਵੀ ਨਹੀਂ ਝਾਂਜਰ ਚੂੜੀ ਛਣਕਣ ਦਾ |
ਪੋਟਾ ਪੋਟਾ ਰਿਸ਼ਵਤ ਖੋਰੀ ਟੁੱਕ ਦਿੱਤਾ,
ਹੁਕਮ ਨਹੀਂ ਪਰ ਮੇਰੇ ਪੰਜਾਬ ਨੂੰ ਵਿਲਕਣ ਦਾ |
ਚੁੱਪ ਕਰੋ ਤੁਸੀਂ ਪਿੰਜਰੇ ਦੇ ਵਿੱਚ ਕੈਦ ਹਾਲੇ,
ਕੋਈ ਮਜ਼ਾ ਨਹੀਂ ਯਾਰ ਪਰਿੰਦਿਓ ਚਹਿਕਣ ਦਾ |
ਵਿਦਰੋਹੀ ਮੇਰੇ ਲਫਜ਼ਾਂ ਨੂੰ ਤਮਗੇ ਕਿੱਥੇ,
ਬਣੂ ਸਬੱਬ ਕਦੇ ਹਿੱਕ 'ਚ ਗੋਲੀ ਲਿਸ਼ਕਣ ਦਾ |
ਗਿੱਲ ਤਾਂ ਕਾਗਜ਼ ਤੇ ਅੰਗਾਰੇ ਚਿਣਦਾ ਹੈ,
ਵੱਲ ਨਾ ਉਹਨੂੰ ਆਵੇ ਬਹਿਰ 'ਚ ਲਿਖਣ ਦਾ |
No comments:
Post a Comment